Affichage de contenus web Affichage de contenus web

Développement scolaire EF

De PDS ass de legale Kader fir déi Themen zesummen unzegoen, déi fir iech als Schoulgemeinschaft besonnesch wichteg sinn. Sou kënnen d'Konditiounen ënnert deenen d'Kanner léieren, an och den Aarbechtskontext vum Schoulpersonal bewosst a geziilt verbessert ginn.

Den aktuelle Schoulentwécklungscycle 2021-2024 kënnt mat der Rentrée 2023/2024 an dat drëtt a lescht Joer. Dat ass de Moment fir sech déi néideg Zäit ze huele fir e Réckbléck ze zéie vun deem wat als Schoul erreecht a geschafft gouf (Bilan), ze kucke wou mer am Moment stinn (Etat des lieux) a nächst Entwécklungsschrëtt fir 2024-2027 ze plangen (Objectifs).

Idealerweis geschitt dat an der Zesummenaarbecht mat allen internen an externe Schoulpartner.

Mat Bléck op d'Preparatioun vum nächste Schouljoer fannt dir hei eng Iwwersiicht, wat dat konkret bedeit. D'Divisioun vun der Schoulentwécklungsbegleedung an d'Instituteurs spécialisés en Développement Scolaire (I-DS), si wéi gewinnt fir iech do, fir iech bei der Planung an Ëmsetzung vun de verschiddenen Etappen beschtméiglech ze ënnerstëtzen.

Iwwergangsjoer 2023/ 2024

Item1Item2Item3Item4Item5Item6

État des lieux et priorités

×

État des lieux

Beim Etat des lieux (EdL) geet et drëm, sech e ganzheetlechen Iwwerbléck iwwert sämtlech Aktivitéite vun der Schoulgemeinschaft ze verschaafen. Am Sënn vun enger kontinuéierlecher Weiderentwécklung gi bei der Opstellung vum Etat des lieux, op Basis vun dem viregen Etat des lieux, d'Informatiounen aus de verschiddene Beräicher op den aktuelle Stand gesat.
 
Ergänzend fléissen d'Perspektive vun Regionaldirektioun, Maison Relais, Elteren, Geméng an, a Conclusiounen an Analysen kënne mat Donnéeën ënnerluecht ginn.
 
Folgend Froe sinn an dësem Prozess relevant:
  • Wou sti mir elo? (Constats)
  • A wéi engem Beräich si mir gutt opgestallt a wou nach manner gutt?
  • Wou si mer zefridden, wou kënne mer eppes besser maachen?
  • Wou leien potentiel Entwécklungsfelder? (Analyse)

Et gi 7 prioritär Domäner, déi all Schoul am Kader vum Etat des lieux muss d'Lupp huelen:

  • Verbesserung vun der Qualitéit vun der Bildung
  • Organisatioun vum Appui pédagogique
  • Encadrement vun Kanner mat spezifesche Besoinën
  • Integratioun vun Informatiouns- a Kommunikatiounstechnologien (TIC)
  • Kollaboratioun mat den Elteren
  • Kollaboratioun tëscht der Schoul an der Maison relais
  • Interkulturalitéit

Weiderféirend kënne je no Bedarf, zousätzlech Domäner beliicht ginn (cf "Guide de référence a Mediekompass"). 

 

Priorités

Aus der Analyse vum Bilan an dem EdL eraus erginn sech Schwéierpunkten/Priorités, déi an engem weidere Schratt participativ zu Ziler formuléiert ginn. Fir d'Prioritéiten ze bestëmmen, kënnen ënnerschiddlech Krittären erugezu ginn, wéi z.B. Wichtegkeet, Sënnhaftegkeet, Drénglechkeet, "Notzen-Opwand", Bedarf, Nohaltegkeet, ...

Am Sënn vun enger breeder Ënnerstëtzung wier et vu Virdeel, hei och d'Meenung vun de Schoulpartner, souwéi der Regionaldirektioun anzehuelen.

Zil ass et Folgendes ze entscheeden:
  • Wéi eng Stäerkte sollen ausgebaut ginn?
  • Wéi eng Erausfuerderung(e) gi mer un?

Objectifs et "Grandes lignes"

×

En Objectif soll de Wonschzoustand beschreiwen, deen een no dräi Joer ka feststellen. D'Grandes lignes weise Méiglechkeeten op, wéi een d'Objectif(s) kann erreechen.

Dës Objectifs ginn zesumme mat der provisorescher Schoulorganisatioun am Gemengerot festgehalen a spéitsens fir den 01.07.2024 un de MENJE geschéckt.

Procédure d'Approbation

×
D'Approbatiounsprozedur besteet aus:
  • Der Validatioun vum Zil/den Ziler an der Plenière vun der Schoul
  • Dem Avis vun den Elterevertrieder
  • Dem Avis vum Regionaldirekter
  • Dem Avis vun der Schoulkommissioun
  • Dem Arrêté vum Gemengerot (gekoppelt un déi provisorescher Schoulorganisatioun)
  • Der Approbatioun vum Minister

Sous-Objectifs an Aktiounen

×

D'Objectif gëtt/ginn an een oder méi Sous-objectif(s) mat Aktiounspläng opgeschlësselt fir op déi spezifesch Bedierfnesser vun der Schoulgemeinschaft anzegoen. Déi konkret Schrëtt fir d' Zilerreechung gi präzis a gräifbar formuléiert. Unhand vu Krittäre kann ee feststellen, ob e Sous-objectif erreecht gouf.

Mise en oeuvre suivis réguliers

×

An der Mise en oeuvre dierf ee Verschiddenes probéieren an et gehéiert zum normale Léierprozess, datt net ëmmer alles direkt geléngt. De systematesche Suivi vun de geplangte Sous-objectifs an Aktiounen ass e Schlësselelement am Schoulentwécklungsprozess. E liwwert wichteg Informatioune fir ze evaluéieren, ob ee mat den aktuellen Demarchen nach um richtege Wee ass oder ob Upassunge musse gemaach ginn. Sou ginn Mise en oeuvre an Auto-Evaluatiounsphasen fléissend aneneen iwwer.

D'Bilans intermédiaires bilden d'Grondlag fir de Bilan global um Enn vum Schoulentwécklungscycle ze zéien.

Bilan global

×

De Bilan global ass e Réckbléck. D'Erfarungswerter aus der Schoulentwécklungsaarbecht vun 2021-2024 solle gesammelt an um Niveau vun der Schoul diskutéiert ginn. Déi doraus resultéirend Erkenntnisser fléissen bei de weideren Etappen mat an.

Folgend grouss Froe sinn hei wichteg:
  • Wat gouf ëmgesat?
  • Wéi gouf et ëmgesat?
  • Wéi waren d'Bedeelegung an d'Réckmeldungen vun de Schoulpartner?
  • Firwat goufe Saachen ëmgesat oder net? Firwat si Prozesser gutt oder schlecht gelaf?
  • Wat war d'Plus value fir d'Schüler, d'Enseignanten an d'Schoulgemeinschaft am allgemengen?

D'Conclusioune vum Bilan global fléissen an déi verschidden Domäner vum Etat des lieux vum "neien " Schoulentwécklungscycle an.